ആൽബർട്ടയിൽ സ്കൂൾ ലോക്ക്ഡൗണുകൾ വർധിക്കുന്നു; ടംബ്ലർ റിഡ്ജ് വെടിവെപ്പിന് പിന്നാലെ ജാഗ്രത ശക്തമാക്കി ആർ.സി.എം.പി.

 ബ്രിട്ടീഷ് കൊളംബിയയിലെ ടംബ്ലർ റിഡ്ജിലുണ്ടായ കൂട്ടക്കുരുതിക്ക് പിന്നാലെ,  ആൽബർട്ടയിൽ ആയുധധാരികളെ കണ്ടെന്ന പരാതികളും സ്കൂൾ ലോക്ക്ഡൗണുകളും വർധിക്കുന്നു. കഴിഞ്ഞ ചൊവ്വാഴ്ച ടംബ്ലർ റിഡ്ജ് സ്കൂളിലുണ്ടായ വെടിവെപ്പിൽ ഒൻപത് പേർ കൊല്ലപ്പെട്ടതിന് ശേഷം ആൽബർട്ടയിലെ വിവിധ നഗരങ്ങളിൽ നിന്ന് നിരവധി എമർജൻസി  കോളുകളാണ് റോയൽ കനേഡിയൻ മൗണ്ടഡ് പോലീസിന് (RCMP) ലഭിക്കുന്നത്. ഹൈ റിവർ, ഫോർട്ട് മക്മറി, എഡ്സൺ, ഷെർവുഡ് പാർക്ക് എന്നിവിടങ്ങളിലെ സ്കൂളുകൾ ഇതേത്തുടർന്ന് മണിക്കൂറുകളോളം അടച്ചിടേണ്ടി വന്നു. ഈ വർധനവ് ടംബ്ലർ റിഡ്ജ് ദുരന്തത്തോടുള്ള ജനങ്ങളുടെ സ്വാഭാവികമായ ആശങ്കയും ജാഗ്രതയും മൂലമാകാം എന്ന് ആർ.സി.എം.പി വക്താവ് കോർപ്പറൽ ട്രോയ് സാവിങ്കോഫ് പറഞ്ഞു.

റിപ്പോർട്ട് ചെയ്യപ്പെട്ട ഭീഷണികളിൽ ഭൂരിഭാഗവും വ്യാജമോ തെറ്റിദ്ധാരണ മൂലമുള്ളതോ ആണെന്ന് പോലീസ് വ്യക്തമാക്കി. എഡ്സണിൽ ബൈബിൾ വചനങ്ങൾ ഉച്ചത്തിൽ വിളിച്ചുപറയുകയും വിദ്യാർത്ഥികൾക്ക് നേരെ ഭക്ഷ്യവസ്തുക്കൾ എറിയുകയും ചെയ്ത ഒരാളെ പോലീസ് അറസ്റ്റ് ചെയ്തു. ഇയാൾ ഉപയോഗിച്ചത് ഒരു കളിത്തോക്കാണെന്ന് പിന്നീട് നടത്തിയ പരിശോധനയിൽ വ്യക്തമായി. മറ്റ് ചിലയിടങ്ങളിൽ ആയുധങ്ങളുമായി അജ്ഞാതർ എത്തിയെന്ന സന്ദേശങ്ങൾ ലഭിച്ചെങ്കിലും തെളിവുകളൊന്നും കണ്ടെത്താനായില്ല.

എങ്കിലും, ഇത്തരം സന്ദർഭങ്ങളിൽ ഒട്ടും അലംഭാവം കാട്ടില്ലെന്നും സംശയാസ്പദമായ എന്തിനെക്കുറിച്ചും പോലീസിനെ അറിയിക്കാൻ മടിക്കരുതെന്നും അധികൃതർ പൊതുജനങ്ങളോട് നിർദ്ദേശിച്ചു. സ്കൂളുകളുടെ സുരക്ഷ ഉറപ്പാക്കാൻ ഹോൾഡ് ആൻഡ് സെക്യൂർ, ലോക്ക്ഡൗൺ തുടങ്ങിയ കർശന നടപടികൾ വരും ദിവസങ്ങളിലും തുടരാനാണ് പോലീസിൻ്റെ തീരുമാനം.